Toofan movie review

           

                  

                        ఉద్యమ సునామీలో తేలిపోయిన ‘తుఫాన్’!

‘’ ‘అల్లూరి సీతారామరాజు’ సినిమాను మీరు రీమేక్ చేస్తారా’’? అని అడిగితే ‘‘మా నాన్నగారు చేసిన క్లాసిక్ మూవీస్ లో అదొకటి. దాన్ని రీ-మేక్ చేయడం అంత బుద్ధితక్కువ పనిమరొకటి ఉండదు’’ అన్నాడు మహేశ్ బాబు.

‘’ ‘శివ’ సినిమా రీ-మేక్ చేసే ఆలోచన ఉందా’’? అని నాగ చైతన్య ను అడిగితే… ‘‘టాలీవుడ్లో అదో ట్రెండ్ సెట్టర్. దాన్ని టచ్ చేయడం ఎంత మాత్రం సరైంది కాదు’’ అన్నాడు నాగచైతన్య.

అటువంటింది… ఏకంగా యంగ్రీ యంగ్ మేన్ అమితాబ్ బచ్చన్ కెరీర్ లో ది బెస్ట్ అనిపించుకునే సినిమాల్లో ఒకటైన ‘జంజీర్’ను రీమేక్ చేయడానికి ఎంత ధైర్యం ఉండాలి! పైగా బాలీవుడ్ ఎంట్రీకి ఆ సినిమాను ఎంచుకోవడం అంటే ఎంత ఆత్మవిశ్వాసం ఉండాలి!! అవన్నీ తనకు ఉన్నాయని చిరంజీవి తనయుడు రామ్ చరణ్ భావించాడు. అందుకనే దర్శకుడు అపూర్వ లాఖియాతో కలిసి ‘జంజీర్’ మూవీని రీమేక్ చేశాడు. అదే సినిమా కొందరు తెలుగు ఆర్టిస్టులతో ‘తుఫాన్’గానూ తెరకెక్కింది. 6వ తేదీ ఈ సినిమా రెండు భాషల్లో ప్రపంచవ్యాప్తంగా విడుదలైంది.

ఇక సినిమా విషయానికి వస్తే…

హైదరాబాద్లో పోలీస్ ఆఫీసర్ గా ఉన్న విజయ్ ఖన్నా… నడిరోడ్డు మీద ధర్నాకు దిగిన అధికారపార్టీ శాసన సభ్యుడి మీదే చెయ్యి చేసుకుంటాడు. దాంతో అతన్ని ముంబాయికి ట్రాన్స్ ఫర్ చేస్తారు. ఎ.సి.సి.గా బాధ్యతలు స్వీకరించిన విజయ్ దృష్టి ఆయిల్ మాఫియా మీద పడుతుంది. కల్తీ ఆయిల్ తో కోట్లు రూపాయలను అక్రమంగా సంపాదిస్తున్న తేజ ఆటలు కట్టించడానికి విజయ్ నడుం బిగిస్తాడు. అందుకోసం షేర్ ఖాన్ సాయం తీసుకుంటాడు. తేజ అనుచరులు ఓ సబ్ కలెక్టర్ ను సజీవ దహనం చేయడాన్ని ఎన్.ఆర్.ఐ. మాలా చూస్తుంది. ఆమెను సాక్షిగా కోర్టుకు హాజరు పరిచి తేజను అరెస్ట్ చేయాలనుకుంటాడు విజయ్. అయితే పోలీస్ కమీషనర్ అతన్ని విధుల నుండి తప్పిస్తాడు.  సస్పెండ్ అయిన విజయ్ ఖన్నా ఆయిల్ మాఫియా ఆటల్ని ఎలా కట్టించాడు? తన తల్లిదండ్రుల మరణానికి కారకుడైన వ్యక్తిని ఎలా హతమార్చాడు? అన్నదే మిగతా కథ.

‘ఇలాంటి సినిమాలు ఇప్పటికే వందల కొద్ది చూశాం కదా!’ మీకు సందేహం రావొచ్చు. అది నిజమే. అయితే నలభై ఏళ్ళ క్రితం ఇదే కథతో అమితాబ్, ప్రకాశ్ మెహ్రా ఓ సంచలన  విజయాన్ని నమోదు చేసుకున్నారు. దానికి సలీమ్- జావేద్ రచన తోడైంది. నాలుగు దశాబ్దాల తర్వాత కూడా పాత చింతకాయ పచ్చడి లాంటి కథతోనే విజయం సాధించాలను కోవడం, పైగా లార్జర్ దేన్ లైఫ్ ఇమేజ్ ఉన్న అమితాబ్ లాంటి వ్యక్తి సినిమా కథను తీసుకోవడం ఏ రకంగానూ తెలివైన ఆలోచన కాదు.

ఇవాళ ఈ సినిమాను ఉత్తరాది ప్రేక్షకులంతా ‘జంజీర్’తో పోల్చుతున్నారు. అంతేకాదు… అమితాబ్ జీవం పోసిన విజయ్ ఖన్నా పాత్రతోనే రామ్ చరణ్ పాత్రనూ చూస్తున్నారు. దాంతో ఏ స్థాయిలోనూ ఈ సినిమా మాతృకకు సమ ఉజ్జీ కాదని తేల్చేస్తున్నారు. మాటకారి ఎన్.ఆర్.ఐ. పాత్రను ప్రియాంక చోప్రా బాగానే చేసినా, ఆమె పాత్రలోని ఔచిత్యం మాత్రం ఎవరికీ అంతుచిక్కడం లేదు. ఫేస్ బుక్ ఫ్రెండ్ పెళ్ళికని ఆమె అమెరికా నుండి రావడం, పెళ్ళిలో విపరీతంగా తాగేసి డాన్సు చేయడం, హోటల్ కు వెళ్ళే దారిలో ఓ మర్డర్ ను చూసి పోలీసులకు ఫోన్ చేయడం, ఆపైన సాక్ష్యం చెప్పలేనంటూ వెనుదిరగడం… అంతా ఆషామాషీ వ్యవహారంగానే కనిపిస్తుంది. చివరకు విజయ్ ఖన్నా ఎమోషనల్ బ్లాక్ మెయిల్ తర్వాత మనసు మార్చుకుని, కోర్టుకు హాజరవుతానని చెప్పడం, అతనితో ఫ్లాట్ లోనే దిగి, అతనికి శారీరకంగా దగ్గరకావడం చూస్తుంటే… ఈ పాత్ర ఎటునుండి ఎటుపోతోంది అనే సందేహం కలుగుతుంది.  ఇక షేర్ ఖాన్ పాత్రలో శ్రీహరి తనదైన నటన కనబరిచాడు. అయితే అతను  పోలీస్ స్టేషన్ లోకి ప్రవేశించగానే ఎసిపి విజయ్ అతని కాలర్ పట్టుకోవడం ఎబ్బెట్టుగా ఉంది. హిందీలో ఈ పాత్రను సీనియర్ నటుడు సంజయ్ దత్ చేయడంతో అక్కడ మరింత విమర్శకు గురైంది. ‘తుఫాన్’ సినిమాలో కాస్త మార్కులు బాగా పడ్డాయంటే ప్రకాశ్ రాజ్ కే. తెలుగు ప్రేక్షకులు అతన్ని ఈ తరహా పాత్రలో చాలా సినిమాల్లోనే చూసినా… ప్రకాశ్ రాజ్ తనదైన శైలిని కనబరిచాడు. మోనా పాత్రలో మాహీగిల్ మెరిపించలేక పోయింది. చాలా సందర్భాలలో వీరిద్దరి మధ్య సంభాషణలు కూడా హద్దులు దాటాయి. జర్నలిస్ట్ గా నటించిన తనికెళ్ళ భరణీదీ రొటీన్ క్యారెక్టరే. చంద్రబోస్ పాటలూ ఆకట్టుకోలేదు. ఏ రకంగానూ, ఏ స్థాయిలోనూ ఈ సినిమా ఇటు తెలుగువారిని, అటు ఉత్తరాది వారిని మెప్పించలేకపోయింది. అక్కడి వారు ‘జంజీర్’తో పోల్చి పెదవి విరుస్తున్నారు. ఇక్కడి వారు ఉద్యమ సునామీ నేపథ్యంలో ‘తుఫాన్’ను పట్టించుకోవడం లేదు.

సమైక్యాంధ్ర ఉద్యమం తీవ్రరూపం దాల్చిన నేపథ్యంలో ఈ సినిమా విడుదల కావడంతో తెలుగు చిత్రసీమ దృష్టి అంతా దీని మీదనే ఉంది. ‘తుఫాన్’కు ప్రజల నుండి పెద్దగా వ్యతిరేకత రాకపోతే తమ సినిమాలూ విడుదల చేయొచ్చని అగ్ర చిత్రాల నిర్మాతలు ఆశగా ఎదురుచూశారు. . ప్రతికూల పరిస్థితులు ఉంటాయని తెలిసి కూడా తప్పని పరిస్థితుల్లో ఈ సినిమాను నిర్మాతలు విడుదల చేశారు. విచిత్రం ఏమంటే కేంద్ర మంత్రి పదవికి చిరంజీవి రాజీనామా చేయనందుకు అటు సీమాంధ్రలోనూ, హైదరాబాద్ ను యు.టి. చేయాలన్నందుకు ఇటు తెలంగాణాలోనూ పలు చోట్ల సినిమా ప్రదర్శనను ఆందోళన కారులు అడ్డుకున్నారు. ఈ విషయాన్ని హీరో రామ్ చరణ్ అంగీకరిస్తూ, ‘తుఫాన్’ విడుదల రోజునే ‘సినిమా కంటే ఉద్యమం పెద్దది’ అని స్టేట్ మెంట్ ఇచ్చాడు. ఈ తెలివి ‘జంజర్’ ను రీమేక్ చేసే ముందు ఉండి వుంటే బాలీవుడ్ ఎంట్రీ మరింత బాగుండేది.